|| રાજ્ય પારિતોષિક વિજેતા દિલીપભાઈ ભલગામીયા સાથે સંવાદ || " સંવાદ શ્રેણી " મણકો -1 || - JIVANT SHIKSHAN

The Blog is Educational news and information

Breaking

Post Top Ad

Post Top Ad

Friday, September 4, 2020

|| રાજ્ય પારિતોષિક વિજેતા દિલીપભાઈ ભલગામીયા સાથે સંવાદ || " સંવાદ શ્રેણી " મણકો -1 ||

◆ રાજ્ય પારિતોષિક વિજેતા દિલીપભાઈ ભલગામીયા સાથે " સંવાદ શ્રેણી " કાર્યક્રમ અંતર્ગત ખાસ મુલાકાત.
●●●●●●●●●●●●●●●●●●●●●●●●●●●●●●●●●●●●●●●●●●●●●●●●●●●●●●●●●●●●●●●●●●●●●●●●●●●●
          ●● રાજ્ય પારિતોષિક વિજેતા શિક્ષક પરિચય ●●  
   શ્રી દિલીપભાઈ ભલગામીયા
          
◆મુખ્ય શિક્ષક (HTAT) (પંડિત દીનદયાળ પ્રા.શાળા નં-૧, બોટાદ)
◆ CRG (MSB., C.R.C.-1, Botad)
◆મંત્રીશ્રી (શ્રી શ્રી માં શારદામણિદેવી ટ્રસ્ટ ચેરી.ટ્રસ્ટ, બોટાદ)
 ◆ ઉપપ્રમુખ શ્રી વરિયા યુવા શિક્ષણ સમિતિ, બોટાદ
◆ જિલ્લા કોઓર્ડિનેટર (યોગ, આર્ટ ઓફ લીવીંગ, બોટાદ જિલ્લા
◆સભ્ય (કવિશ્રી બોટાદકર સાહિત્ય સભા)
 ◆ ડાયરેકટર ઓફ એડમિનિસ્ટ્રેટીવ (જાયન્ટસ ગ્રુપ ઓફ બોટાદ)
◆ સભ્ય (વરિયા પ્રજાપતી જ્ઞાતી મંડળ - બોટાદ
●●●●●●●●●●●●●●●●●●●●●●●●●●●●●●●●●●●●●●●●●●●●●●●●●●●●●●●●●●●●●●●●●●●●●●●●●●●●
જીવંત શિક્ષણ- દિલીપભાઈ જીવંત શિક્ષણ ' સંવાદ શ્રેણી ' કાર્યક્રમમાં આપનું હાર્દિક સ્વાગત છે અને  રાજ્ય પારિતોષિક પ્રાપ્ત કરવા બદલ જીવંત શિક્ષણ બ્લોગ પરિવાર આપને  અભિનંદન પાઠવે છે.
◆જવાબ- આભાર કપિલભાઈ
★જીવંત શિક્ષણ- દિલીપભાઈ આ પારિતોષિક મેળવી આપ કેવી લાગણી અનુભવો છો ?
◆જવાબ- રાજ્ય પારિતોષિક મેળવી ખૂબ જ આનંદની લાગણી અનુભવું છું.
★જીવંત શિક્ષણ- દિલીપભાઈ આપના જીવન - કવન વિશે તેમજ આપના શિક્ષણ અંગે માહિતી આપવા વિનંતી.
◆જવાબ- કવિશ્રી બોટાદકર ની જન્મભૂમિ અને રાષ્ટ્રીય શાયર ઝવેરચંદ મેઘાણીની કર્મભૂમિ બોટાદમાં જન્મ થયો છે . બાળપણ બોટાદમાં જ પસાર થયું. પ્રાથમિક શિક્ષણની શરૂઆત નગર પ્રાથમિક શિક્ષણ સમિતિ સંચાલિત તાલુકા શાળામાં શરૂ કર્યું. જ્યાં આજે  હાલ મુખ્ય શિક્ષક (HTAT) તરીકે ફરજ બજાવે છે . ત્યારબાદ શ્રેષ્ઠ પરિણામ મેળવી માધ્યમિક શિક્ષણ બોટાદની શ્રી એમ.ડી.શાહ વિદ્યાલયમાં શ્રેષ્ઠ પરિણામ સાથે પૂર્ણ કરી આગામી પી.ટી.સી. અભ્યાસ જિલ્લા શિક્ષણ તાલીમ ભવન, ભાવનગર પૂર્ણ કર્યો. ત્યારબાદ શિક્ષક તરીકે ફરજ બજાવવાની સાથે બાહય અભ્યાસમાં ઘો-૧૨, હિંદી વિષચ સાથે B.A., M.A., IGNOU-દિલ્હી થી B.Ed.,  M.Ed. અભ્યાસ કર્યો.
★જીવંત શિક્ષણ- રાજ્ય પારિતોષિક માટે નોમિનેશન થવા માટે આપના ક્યા મુખ્ય પ્રોજેક્ટે આપને પ્રેરણા આપી ?
◆જવાબ-“ એક મુઠ્ઠી કઠોળ, કુપોષણ હટાવો.” એજ્યુકેશન ઈનોવેશને મને રાજ્ય પારિતોષિક માટે પ્રેરણા પૂરી પાડી. 
★જીવંત શિક્ષણ- આપના આ પ્રોજેક્ટ વિશે અમારા વાચકોને વિગતવાર જણાવશો.
◆જવાબ-વર્ષ ૨૦૧૨ માં હું  બોટાદ જિલ્લાની નગર પ્રાથમિક શાળા નંબર ૧ માં શિક્ષક તરીકે જોડાયો.ધોરણ ૧ થી ૮ ની આ શાળામાં ૬૫ કુમાર અને ૨૩૫ કન્યા મળીને કુલ ૩૦૦ બાળકો અને ૧૧ શિક્ષક મિત્રો હતા. હું  ધોરણ ૫ થી ૮ માં વિજ્ઞાન વિષય ભણાવતો હતો. વર્ષ ૨૦૧૩માં શાળામાં આરોગ્ય તપાસણી  કાર્યક્રમ અંતર્ગત ડોકટરના માર્ગદર્શન નીચે કુલ ૭૫ કન્યાઓનું હિમોગ્લોબીન તપાસ કરતાં ૫૫ કન્યાઓનું હિમોગ્લોબીનનો આંક માત્ર ૬થી૯ મળ્યું,જે 12 થી 16 વચ્ચેનું હોવું જોઈએ. ડોકટરે જણાવ્યું કે બાળાઓમાં હિમોગ્લોબીનની ઉણપ છે.ત્યારબાદ બાળાઓના નાસ્તાના ડબ્બાની તપાસ કરી, તો જોવા મળ્યું કે બાળાઓ નાસ્તામાં કોઈ પ્રોટીનવાળી વસ્તુઓ નહિં,પણ મમરા, કુરકુરે જેવી વસ્તુઓનો આહારમાં ઉપયોગ કરે છે. ડોકટરની સલાહ પ્રમાણે તેમના આહારમાં પ્રોટીનયુક્ત આહાર જેવો કે કઠોળ અને શાકભાજીનું પ્રમાણ વધારવાની જરૂર હતી.શાળાના બીજા શિક્ષકમિત્રો અને SMC ના સભ્યો  સાથે ચર્ચાના અંતે કન્યાઓને નાસ્તામાં કઠોળ અને લીલા શાકભાજી આપવાનું નક્કી કર્યું. “એકમુઠ્ઠી કઠોળ, કુપોષણ હટાવો”  નામનો પ્રયોગ શાળામાં અમલમાં મુકવામાં આવ્યો.    
આ પ્રયોગના ભાગરૂપે દર શુક્રવારે નક્કી કરેલ ધોરણના બાળકો તથા સ્ટાફ પોતાને ઘેરથી મગ,મઠ,ચણા, લીલા વટાણા વગેરેમાંથી કોઈ એક મુઠ્ઠી કઠોળ શાળામાં લાવવામાં આવે છે. ત્યારબાદ, બધુ કઠોળ પ્રાર્થના સમય દરમિયાન ભેગું કરીને એક સુતરાઉ કાપડમાં બાળાઓ દ્વારા જ તેને પલાળીને ફણગાવવા માટે મુકવામાં આવે.પછી બીજા દિવસે શનિવારે મધ્યાહન ભોજન યોજનાના સંચાલકના સહયોગથી ફણગાવેલા કઠોળને લીંબુ, મીઠું, લીલા મરચા, ટામેટાં, કોથમીરના વઘારથી કઠોળની પૌષ્ટિક ડીશ તૈયાર કરવામાં આવે  અને તેને મેદાનમાં પ્રદર્શનમાં મૂકવામાં આવે. શનિવારે બાલસભા અને કસરત બાદ રિશેષમાં નક્કી કરેલ ધોરણની બાળાઓ આ કઠોળનો નાસ્તો કરે છે.

મહિનામાં એક વખત શાળામાં તમામ બાળક ઘરેથી કઠોળ લાવતા અને શાળામાં  કઠોળ ભેળનું આયોજન કરવામાં આવતું. જાયન્ટસ ગ્રુપ ઓફ બોટાદ અને સહેલી જાયન્ટસ ગ્રુપના દાતાઓના સહયોગથી માર્ચ ૨૦૧૩ સુધી ૭ વખત શાળાના તમામ બાળકો માટે કઠોળ ભેળનું આયોજન કરવામાં આવ્યું. નગર પ્રાથમિક શિક્ષણ સમિતિ-બોટાદ તરફથી પણ આ પ્રયોગ માટે આર્થિક સહયોગ આપવામાં આવ્યો. શાસનાધિકારી કચેરી બોટાદ અને જીલ્લા શિક્ષણાધિકારી કચેરી દ્વારા તાલુકા અને જિલ્લા કક્ષાએ તાલીમમાં અને ચિંતનશિબરમાં આ પ્રયોગ માટે શાળાને પ્રોત્સાહન આપવામાં આવ્યું. આ રીતે દાતા અને સમાજના સહકારથી ધોરણ પ્રમાણે નક્કી કરેલ વારા પ્રમાણે ૬ મહિના સુધી આ પ્રયોગ શાળામાં અમલમાં મુકવામાં આવ્યો.
★જીવંત શિક્ષણ- આપના આ પ્રોજેક્ટમાં કેવા પ્રકારની અડચણો-સમસ્યાઓ આવી ?
◆જવાબ- હા, આ પ્રોજેક્ટમાં બે સમસ્યાઓ આવી હતી તેમાંની મુખ્ય સમસ્યા એ હતી કે કઠોળ લાવવું ક્યાંથી ? આ પ્રયોગના ભાગરૂપે દર શુક્રવારે નક્કી કરેલ ધોરણના બાળકો તથા સ્ટાફ પોતાને ઘેરથી મગ,મઠ,ચણા, લીલા વટાણા વગેરેમાંથી કોઈ એક કઠોળ એક મુઠ્ઠી શાળામાં લાવવામાં આવે.વાલી દ્વારા શાળામાં કેમ કઠોળ મંગાવવામાં  આવે છે તેવા પ્રશ્નો પણ કરવામાં આવ્યા હતા, પરંતુ તેના નિરાકરણ માટે SMC સભ્યો અને શાળાના વર્ગશિક્ષકો દ્વારા "આપણા શરીર માટે કઠોળનીજરૂરિયાત અને ફાયદા" વિષે જાણકારી આપી તેને સમજાવવામાં આવ્યા અને વાલીઓ પણ અમારા આ પ્રોજેક્ટ સાથે સહમત થયાં અને અમારો કામ કરવાનો ઉત્સાહ વધી ગયો.  
બીજી સમસ્યા એ હતી કે પ્રયોગની શરૂઆતમાં બાળકો કઠોળ ઘેરથી લાવે ત્યારે  તેમાંથી કચરું અને કાંકરા જોવા મળતાં.આ  મુશ્કેલીના નિરાકરણ માટે શાળાના શિક્ષિકા બહેનો અને બાળકોની ટીમ બનાવી રિશેષમાં કઠોળની  સાફ-સફાઈ કરવામાં આવતી,આમ આ સમસ્યા પણ હલ કરવામાં આવી હતી.
★જીવંત શિક્ષણ- આપના આ પ્રોજેક્ટનું શિક્ષણલક્ષી શું પરિણામ મળ્યું ?
◆જવાબ- કપિલભાઈ આ પ્રોજેક્ટનું શિક્ષણલક્ષી પરિણામ ખૂબ જ સારું જોવા મળ્યું.આ પ્રયોગમાં અમને કેટલી સફળતા મળી તેની જાણકારી માટે માર્ચ ૨૦૧૩ માં ફરી બાળાઓનો હિમોગ્લોબીન ટેસ્ટ કરાવવામાં આવ્યો અને હિમોગ્લોબીનનો આંક 10 થી 14 વચ્ચેની માત્રામાં જોવા મળેલ. આ પ્રયોગથી બાળાઓની હાજરીની સંખ્યામાં પણ વધારો થયો. ધોરણ ૭-બ માં આ પ્રયોગ પહેલા ૩૬થી ૪૦ બાળકો હાજર રહેલા પ્રયોગ બાદ ૪૫ સુધી બાળકોની હાજરી જોવા મળી.આવી રીતે તમામ વર્ગ અને શાળાની સરાસરી હાજરીમાં વધારો જોવા મળ્યો. બાળકોનાં નાસ્તાના ડબ્બામાં પણ હાલ કઠોળ જોવા મળે છે.બાળકો ઘરે પણ મગ,મઠ,ચણા વગેરેની ભેળ બનાવી ખાય છે અને બાળકોના ઘરે પણ પહેલા માત્ર મસૂરની દાળનો ઉપયોગ કરવામાં આવતો હતો તેનાં સ્થાને કઠોળના ઉપયોગમાં વધારો થયો તે વાતની જાણકારી વાલી મીટીંગ અને વાલી જયારે બાળકોને શાળાએ મુકવા-લેવા આવે ત્યારે મળી. આમ શાળાનું સમાજ સાથે જોડાણ પણ  થયું.
★જીવંત શિક્ષણ- આપની શાળામાં શિક્ષણ ક્ષેત્રે વિશિષ્ટ કામગીરી વિશે માહિતી આપશો.
◆જવાબ-આ શાળા સાથે  છેલ્લા ૨૨ વર્ષથી  જોડાયેલ છું. શાળામાં દાતાશ્રીઓના સહકારથી મુખ્ય ગેઈટ, શાળા પ્રાંગણમાં ભૂગોળના તાદૃશ્ય કરે તેવો ભારત અને ગુજરાતના લાઈવ નકશા, નયનરમ્ય સરસ્વતી માતા મંદિર, સમાજ ઉપયોગ ૮૦ જેટલી ઔષધીય વનસ્પતિઓથી સજજ ઔષધબાગ, ભાષાખંડ, ગણિત-વિજ્ઞાન ખંડ, સામાજિક વિજ્ઞાન ખંડ, જિલ્લાસ્તરનું પુસ્તકાલય,કોમ્પ્યુટરલેબ, અદ્યતન સાઉન્ડ સિસ્ટમ સગવડતાથી શાળાને સજજ કરેલ છે.આજે શાળામાં મુખ્ય શિક્ષકમાં છેલ્લા ૮ વર્ષથી કાર્યરત છે, ત્યારે “મારી સરકારી શાળા શ્રેષ્ઠ શાળા” ને ચરિતાર્થ કરવા સતત પ્રયત્નશીલ રહે છે . શાળાની છાપ સમગ્ર શહેરમાં એક નામાંકિત શાળા તરીકે ઓળખાય છે. શાળામાં વર્ષ દરમિયાન વાર્ષિકોત્સવની ભવ્ય ઉજવણી, શહેરના બાળકો માટે ફ્રી સમર કેમ્પ આયોજન, નોલેજ બેન્કની વિશિષ્ટ કામગીરી, ગણિત, વિજ્ઞાન ભાષાખંડ આગવી છાપ ઊભી કરે છે.  ભૂતપૂર્વ વિદ્યાર્થીઓ તેઓને આર્દશ શિક્ષક ગણે છે. કોરોના કાળ દરમ્યાન લોકડાઉન સમય દરમ્યાન IIM- અમદાવાદ આયોજિત આંતરરાષ્ટ્રીય વેબિનારમાં "કન્યા શિક્ષણ"માં પણ પસંદગી થયેલ હતી.
★જીવંત શિક્ષણ- આપને આ સિવાય  શિક્ષણ ક્ષેત્રે મળેલ પારિતોષિક-સન્માનો-એવોર્ડ અંગે માહિતી આપવા વિનંતી.
◆જવાબ- શાળાના એજ્યુકેશન પ્રોજેકટ સંદર્ભે પૂર્વ રાષ્ટ્રપતિ ર્ડો.એ.પી.જે. અબ્દુલ કલામ સમક્ષ IIM- અમદાવાદ ખાતે એજ્યુકેશન ઈનોવેશન રજુ કરવાનો અમુલ્ય અવસર મળ્યો. રાષ્ટ્રપતિ ભવન દિલ્હીમાં ઈનોવેશન ગેલેરીમાં ઈનોવેશનને સમગ્ર રાષ્ટ્રના એજ્યુકેશન ઈનોવેશનમાં સ્થાન મળેલ છે. વર્ષ ૨૦૧૯ માં IAS-એકેડમી મસુરી, દહેરાદૂન ખાતે ૨૦૧૮ IAS બેન્ચના અધિકારીઓ સમક્ષ  એજ્યુકેશન ઇનોવેશન પ્રસ્તુત કરવાનો અવસર પ્રાપ્ત થયો. GCERT ગાંધીનગર સાથે હિન્દી વિષય, પર્યાવરણ વિષયના એસ.આર.જી. સભ્ય તરીકે કામ કરીને પાઠ્યપુસ્તક લેખન-સમીક્ષામાં સક્રીય કાર્ય કરેલ છે.પૂજ્ય  ભાઈશ્રી રમેશભાઈ ઓઝા-પોરબંદર દ્વારા વર્ષ ૨૦૧૭ અને ૨૦૧૯ માં બે વખત શ્રી સાંદિપનિ ગુરૂ ગૌરવ એવોર્ડ, બોટાદ જિલ્લા શ્રેષ્ઠ શિક્ષક એવોર્ડ, બોટાદ નગરપાલિકાની શ્રેષ્ઠ શાળા સન્માન, સમાજ રત્ન એવોર્ડ, જાયન્ટસ ઇન્ટરનેશનલ સંસ્થા જાયન્ટ્સ ગ્રુપ તરફથી “બેસ્ટ ટીચર સન્માન ” સમગ્ર દેશમાં પ્રતિષ્ઠિત “સૃષ્ટિ સન્માન-૨૦૧૮" LABASANA-મસુરી, દહેરાદૂનમાં શ્રેષ્ઠ એજ્યુકેશન ઈનોવેટર સન્માન , રાષ્ટ્રપતિ ભવનમાં મહામહિમ રાષ્ટ્રપતિ પ્રણવ મુખર્જીના હસ્તે સન્માન 
★જીવંત શિક્ષણ- રાજ્ય પારિતોષિક મેળવ્યા પછી શું આપની જવાબદારી વધી જશે એવું આપ માનો છો ?
◆જવાબ- ના બિલકુલ નહિં, નોકરીની શરૂઆતથી જ મનમાં એક સંકલ્પ કરેલો કે શક્ય તેટલું બાળકોના હિતમાં-વિકાસમાં પ્રદાન કરવું. બાળકો જ સતત નિતનવું કરવા માટે પ્રેરણા આપે છે. માટે રાજ્ય પારિતોષિક પ્રાપ્ત કર્યા પછી પણ શરૂઆતથી જે રીતે કાર્ય કર્યું છે તે રીતે જ આજીવન બાળકો માટે કામ કરતો રહીશ.હા રાજ્ય પારિતોષિક મળ્યા પછી કામ કરવા માટેનો ઉત્સાહ ચોક્કસ વધશે.
★જીવંત શિક્ષણ- રાજ્ય પારિતોષિક રાશિનો ઉપયોગ આપ કઈ રીતે કરશો ? ( આવો પ્રશ્ન પૂછવો ન જોઈએ છતાં પૂછું છું.)
◆જવાબ-રાજ્ય શ્રેષ્ઠ શિક્ષક સન્માન પારિતોષિક રાશિની સંપૂર્ણ રકમ બાળકો પાછળ વાપરવાનો હૃદયનો ઉમળકો છે.  આ રાશિમાંથી ૨૫૦૦૦/- રૂપિયા દિવ્યાંગ બાળકોના શિક્ષણ માટે બોટાદ શહેરમાં કાર્યરત આસ્થા ચેરીટેબલ ટ્રસ્ટનાં  દિવ્યાંગ બાળકોની શિક્ષણ સુવિધા માટે અર્પણ કરવામાં આવશે અને બાકીની ધન રાશિમાંથી  જાયન્ટસ ગ્રુપ ઓફ બોટાદના શિક્ષણકાર્ય પ્રોજેક્ટ માટે ૧૧૦૦૦/-  રૂપિયા અને  બાકીની વધતી રકમ મારી શાળાના બાળકોને શિક્ષણ સુવિધાઓ માટે સમર્પિત  કરવાનું નક્કી કરેલ છે. આ એવોર્ડ સમાજ અને બાળકોની મદદથી મને પ્રાપ્ત થયો છે તો તે એવોર્ડની ધન રાશિ પણ સમાજ અને બાળકોને અર્પણ કરી શિક્ષણ સેવાનું કાર્ય કરવા ઈચ્છું છું.ટૂંકમાં પારિતોષિકમાં મળતી  બધી જ રકમ બાળકોના હિતાર્થે વાપરવાનું નકકી કરેલ છે.
★જીવંત શિક્ષણ- આગામી સમયમાં આપ રાષ્ટ્રીય પારિતોષિક માટે નોમિનેશન કરાવશો ?
◆જવાબ- હા ચોક્કસ, મારો આ પ્રોજેક્ટ ગુજરાત અને દેશભરની અનેક શાળાઓમાં અમલીકરણ કરવામાં આવ્યો છે અને આ વાતનો મને રાજીપો છે. મારો આ પ્રોજેક્ટ હજુ વધુ નેશનલ લેવલ પર વધુને વધુ શાળાઓ સુધી પહોંચે અને  અમલ થાય તે હેતુસર હું ચોક્કસ નેશનલ પારિતોષિક માટે નોમિનેશન કરાવીશ.
★જીવંત શિક્ષણ - દિલીપભાઈ "જીવંત શિક્ષણ" બ્લોગના સંવાદ શ્રેણી કાર્યક્રમમાં ઉપસ્થિત રહેવા બદલ આપનો ખૂબ ખૂબ આભાર અને આપ શિક્ષણક્ષેત્રે ખૂબ જ આગળ વધો તેવી શુભેચ્છાઓ.
◆ જવાબ- કપિલભાઈ જીવંત શિક્ષણ બ્લોગનો હું પણ હૃદયપૂર્વક આભાર વ્યક્ત કરું છું. મારી કામગીરીને આપના બ્લોગ પર રાખી મને જે પ્રોત્સાહન આપ્યું તે બદલ ખૂબ ખૂબ આભાર.

🔘🔘🔘🔘🔘🔘🔘🔘🔘🔘🔘🔘🔘🔘🔘🔘🔘🔘🔘🔘🔘🔘🔘🔘🔘🔘🔘🔘🔘🔘🔘
◆ આપને અમારા બ્લોગ પરની માહિતી સારી લાગી હોય તો નીચે  લિંક પર ક્લિક કરી આપ અમને સોશિયલ મીડિયા પર ફોલો આપ અમારી સાથે સતત જોડાયેલા રહેશો.





No comments:

Post a Comment

Thanks for feedback....